رووداو - هەولێر
گۆرانیبێژو میوزیكژەن ئومێد باڵەبان كە ئێستا خەریكی ئامادە كردنی چەند ئاوازێكە بۆ كردنە گۆرانی، بە (رووداو)ی راگەیاند كەسێكی تایبەتی لەژیاندا نییە كە وەكو خۆشەویستێك خۆشی بوێت "بەڵام هاوڕێی كچم هەیەو ئەو كەسەش كە خۆشمدەوێت دەبێ حەتمەن كورد بێت".
باڵەبان لەدایكبووی 1982ی شاری هەولێرە، لەكاتی بێكاریدا زیاتر خەریكی كاری هونەرییەو كاری موزیك بۆ هونەرمەندان دەكات، هەروەها لەوەڵامی ئەوەی ئایا وەرزش دەكات، دەڵێ "بەگشتی زۆر لەگەڵ وەرزشدا نییم بەتایبەت تۆپی پێ، هەتا ئێستا زۆرم هەوڵداوە موعجبی بم بەڵام نەكراوە، بەڵام ئەگەر یاری ریال مەدرید هەبێت و یارییەكە بەهێز بێت تەماشای دەكەم، ئەگەرنا زۆر عاشقی تۆپی پێ نیم كە هەموو كاروبارەكانمی بۆ بەجێبێڵم".
وەكو خۆی باسیكرد ئەو لە چوارپارچەی كوردستان زیاتر كچانی رۆژهەڵاتی كوردستانی پێجوانەو دەڵێ "كچانی رۆژهەڵات جوانترین كچانی كوردستانن". ئومێد لەخواردن زیاتر حەزی لە برنج و مریشكە، بەڵام كەبابیشی زۆر پێخۆشە "بەتایبەت كەبابی هەولێرییان، ئەویش هی هەندێ كەبابخانەی تایبەت".
ئەو مۆسیقاژەنە دایكی لەهەموو كەس زیاتر خۆش دەوێ، لەوبارەیەوە دەڵێ "ئەگەر سیدیەك بەرهەمبێنم حەتمەن لەداهاتوو گۆرانییەك بۆ دایكم دەڵێم، ئەویش ئەوكاتەی كە تێكستێكی جوان و پڕ بەپێست بۆ دایك بدۆزمەوە ".
سهرچاوه
ڕووداو.نێت